بہار کا ہے یہ موسم مگر بہار نہیں

بہار کا ہے یہ موسم مگر بہار نہیں

دل حزیں کو کہیں ایک پل قرار نہیں

میں منتظر ہوں سحر تو ضرور آئے گی

ہواؤ میرا چراغوں پہ انحصار نہیں

ہر ایک موڑ پہ تنہائیوں نے ساتھ دیا

مجھے کسی کا بھی اے دوست انتظار نہیں

بتا رہے ہو کہ صحرا سے لوٹ آیا ہوں

تمہارے دامن دل پہ کہیں غبار نہیں

محبتوں کے فسانے میں رہ گیا تنہا

ترے صحیفۂ دل میں مرا شمار نہیں

محبتوں کے قرینے بدل گئے ہیں بہت

یہاں کسی کے لئے کوئی سوگوار نہیں

نظر ملاؤ حقائق سے تم یہاں اجملؔ

خیال و خواب کی دنیا کا اعتبار نہیں