bahaar ka hai ye mausam magar bahaar nahin

bahār kā hai ye mausam magar bahār nahīñ

dil-e-hazīñ ko kahīñ ek pal qarār nahīñ

maiñ muntazir huuñ sahar to zarūr aa.egī

havāo merā charāġhoñ pe inhisār nahīñ

har ek moḌ pe tanhā.iyoñ ne saath diyā

mujhe kisī kā bhī ai dost intizār nahīñ

batā rahe ho ki sahrā se lauT aaya huuñ

tumhāre dāman-e-dil pe kahīñ ġhubār nahīñ

mohabbatoñ ke fasāne meñ rah gayā tanhā

tire sahīfa-e-dil meñ mirā shumār nahīñ

mohabbatoñ ke qarīne badal ga.e haiñ bahut

yahāñ kisī ke liye koī sogvār nahīñ

nazar milāo haqā.eq se tum yahāñ 'ajmal'

ḳhayāl-o-ḳhvāb kī duniyā kā e.atibār nahīñ

bahaar ka hai ye mausam magar bahaar nahin

dil-e-hazin ko kahin ek pal qarar nahin

main muntazir hun sahar to zarur aaegi

hawao mera charaghon pe inhisar nahin

har ek moD pe tanhaiyon ne sath diya

mujhe kisi ka bhi ai dost intizar nahin

bata rahe ho ki sahra se lauT aaya hun

tumhaare daman-e-dil pe kahin ghubar nahin

mohabbaton ke fasane mein rah gaya tanha

tere sahifa-e-dil mein mera shumar nahin

mohabbaton ke qarine badal gae hain bahut

yahan kisi ke liye koi sogwar nahin

nazar milao haqaeq se tum yahan 'ajmal'

KHayal-o-KHwab ki duniya ka eatibar nahin