bahaar thi na chaman tha na aashiyana tha

bahār thī na chaman thā na āshiyāna thā

ajiib rang meñ guzrā huā zamāna thā

ba-faiz-e-ḳhūn-e-jigar ab vo ho rahā hai chaman

kabhī jo mere muqaddar se qaid-ḳhāna thā

hudūn-e-kaun-o-makāñ meñ bhī jo samā na sakā

mirī hayāt kā vo muḳhtasar fasāna thā

nazar meñ dair-o-haram the ki maiñ samajh na sakā

jahāñ jhukī thī jabīñ un kā āstāna thā

bas itnā yaad hai mujh ko ki barq chamkī thī

phir us ke baad chaman thā na āshiyāna thā

fareb-e-husn meñ aa.e to ye huā ma.alūm

jahāñ meñ ek yahī ziist kā bahāna thā

junūn-e-shauq kā ik ye bhī mo.ajiza hai 'nazīr'

vahī hai aaj haqīqat jo kal fasāna thā

bahaar thi na chaman tha na aashiyana tha

ajib rang mein guzra hua zamana tha

ba-faiz-e-KHun-e-jigar ab wo ho raha hai chaman

kabhi jo mere muqaddar se qaid-KHana tha

hudun-e-kaun-o-makan mein bhi jo sama na saka

meri hayat ka wo muKHtasar fasana tha

nazar mein dair-o-haram the ki main samajh na saka

jahan jhuki thi jabin un ka aastana tha

bas itna yaad hai mujh ko ki barq chamki thi

phir us ke baad chaman tha na aashiyana tha

fareb-e-husn mein aae to ye hua malum

jahan mein ek yahi zist ka bahana tha

junun-e-shauq ka ek ye bhi moajiza hai 'nazir'

wahi hai aaj haqiqat jo kal fasana tha