bahaaron ke nae mausam bulate rah gae

bahāroñ ke na.e mausam bulāte rah ga.e

nazar meñ tū rahā ham jaate jaate rah ga.e

dīvāna ek dil kī baat kah kar chal diyā

mohazzab log saare kasmasāte rah ga.e

kisī ne haal pūchhā thā bas itnī baat thī

mirī āñkhoñ meñ aañsū aate aate rah ga.e

bahut charche the jis dar kī saḳhāvat ke yahāñ

vo auroñ par khulā ham sar jhukāte rah ga.e

vo pahle muskurā.e phir liyā pahlū badal

hamīñ nādān the bas muskurāte rah ga.e

bahaaron ke nae mausam bulate rah gae

nazar mein tu raha hum jate jate rah gae

diwana ek dil ki baat kah kar chal diya

mohazzab log sare kasmasate rah gae

kisi ne haal puchha tha bas itni baat thi

meri aankhon mein aansu aate aate rah gae

bahut charche the jis dar ki saKHawat ke yahan

wo auron par khula hum sar jhukate rah gae

wo pahle muskurae phir liya pahlu badal

hamin nadan the bas muskuraate rah gae