bahaaron se KHizan tak yunhi sair-e-gulsitan kar ke

bahāroñ se ḳhizāñ tak yūñhī sair-e-gulsitāñ kar ke

rafū karte rahe ham jeb-o-dastāñ dhajjiyāñ kar ke

milegā kyā tujhe sayyād mujh ko be-zabāñ kar ke

sukūn-e-qalb miltā hai mujhe āh-o-fuġhāñ kar ke

chaman ko raushnī dī nazr-e-ātish āshiyāñ kar ke

kiyā ye tajraba ham ne ghar apnā rā.egāñ kar ke

haqīqat meñ karam tum ne kiyā hai haq-shanāsoñ par

har ik ko vāqif-e-rasm-e-jabīn-o-āstāñ kar ke

uThā paa.e na ham lutf-e-bahārāñ mausam-e-gul meñ

kahāñ gum ho ga.ī parvāz qaid-e-āshiyāñ kar ke

ab aisī zindagī se maut aa jaatī to behtar thā

huī taz.hīk apnī dāstān-e-dil bayāñ kar ke

agar tafsīl se kahtā to vo shāyad samajh jaate

maiñ ab pachhtā rahā huuñ iḳhtisār-e-dāstāñ kar ke

bhaTakte rahte yūñhī aur na paate 'umr-bhar manzil

baḌā ehsāñ kiyā tum ne sharīk-e-kārvāñ kar ke

samajh meñ aa ga.ī un kī ḳhas-o-ḳhāshāk kī 'azmat

ga.ī haiñ bijliyāñ āḳhir tavāf-e-āshiyāñ kar ke

zahe mashq-e-tasavvur ham unheñ dekhā hī karte haiñ

chhupeñ chāhe jahāñ vo parda-hā-e-darmiyāñ kar ke

samundar phir hilore legā tahzīb-o-tamaddun kā

zarā dekho to 'ājiz' shāmil-e-urdu-zabāñ kar ke

bahaaron se KHizan tak yunhi sair-e-gulsitan kar ke

rafu karte rahe hum jeb-o-dastan dhajjiyan kar ke

milega kya tujhe sayyaad mujh ko be-zaban kar ke

sukun-e-qalb milta hai mujhe aah-o-fughan kar ke

chaman ko raushni di nazr-e-atish aashiyan kar ke

kiya ye tajraba hum ne ghar apna raegan kar ke

haqiqat mein karam tum ne kiya hai haq-shanason par

har ek ko waqif-e-rasm-e-jabin-o-astan kar ke

uTha pae na hum lutf-e-bahaaran mausam-e-gul mein

kahan gum ho gai parwaz qaid-e-ashiyan kar ke

ab aisi zindagi se maut aa jati to behtar tha

hui tazhik apni dastan-e-dil bayan kar ke

agar tafsil se kahta to wo shayad samajh jate

main ab pachhta raha hun iKHtisar-e-dastan kar ke

bhaTakte rahte yunhi aur na pate 'umr-bhar manzil

baDa ehsan kiya tum ne sharik-e-karwan kar ke

samajh mein aa gai un ki KHas-o-KHashak ki 'azmat

gai hain bijliyan aaKHir tawaf-e-ashiyan kar ke

zahe mashq-e-tasawwur hum unhen dekha hi karte hain

chhupen chahe jahan wo parda-ha-e-darmiyan kar ke

samundar phir hilore lega tahzib-o-tamaddun ka

zara dekho to 'ajiz' shamil-e-urdu-zaban kar ke