بہل سکے گا نہ دل اب کسی بہانے سے

بہل سکے گا نہ دل اب کسی بہانے سے

زمانہ ہم سے ہے بیزار ہم زمانے سے

جس آستانے پہ سجدے کو جا نہیں ملتی

بندھی ہے آس مری ایسے آستانے سے

ہر ایک دے نہیں سکتا ہے امتحان وفا

یہ وہ کڑی ہے جو اٹھتی نہیں اٹھانے سے

کوئی جلائے گا کیا سوختہ نصیبوں کو

کہ راکھ آگ پکڑتی نہیں جلانے سے

رلایا خون ہمیں اپنے ضبط گریہ نے

یہ کام اور بگڑتا گیا بنانے سے

تلاش کی گئی جس دم چمن میں بجلی کی

تو دستیاب ہوئی میرے آشیانے سے

دعائیں دیتے ہیں وابستگان درد فراق

غریب بچ گئے سرکار کے بچانے سے

صلائے عشق ہے یک در بگیر و محکم گیر

مجھے تو کام ہے صرف ان کے آستانے سے

قدیرؔ شام و سحر کی اسے بھلا کیا فکر

وظیفہ پاتا ہو جو غیب کے خزانے سے