bahal sakega na dil ab kisi bahane se

bahal sakegā na dil ab kisī bahāne se

zamāna ham se hai bezār ham zamāne se

jis āstāne pe sajde ko jā nahīñ miltī

bañdhī hai aas mirī aise āstāne se

har ek de nahīñ saktā hai imtihān-e-vafā

ye vo kaḌī hai jo uThtī nahīñ uThāne se

koī jalā.egā kyā soḳhta-nasīboñ ko

ki raakh aag pakaḌtī nahīñ jalāne se

rulāyā ḳhuun hameñ apne zabt-e-girya ne

ye kaam aur bigaḌtā gayā banāne se

talāsh kī ga.ī jis dam chaman meñ bijlī kī

to dastiyāb huī mere āshiyāne se

duā.eñ dete haiñ vābastgān-e-dard-e-firāq

ġharīb bach ga.e sarkār ke bachāne se

salā-e-ishq hai yak-dar-ba-gīr-o-muhkam-gīr

mujhe to kaam hai sirf un ke āstāne se

'qadīr' shām-o-sahar kī use bhalā kyā fikr

vazīfa paatā ho jo ġhaib ke ḳhazāne se

bahal sakega na dil ab kisi bahane se

zamana hum se hai bezar hum zamane se

jis aastane pe sajde ko ja nahin milti

bandhi hai aas meri aise aastane se

har ek de nahin sakta hai imtihan-e-wafa

ye wo kaDi hai jo uThti nahin uThane se

koi jalaega kya soKHta-nasibon ko

ki rakh aag pakaDti nahin jalane se

rulaya KHun hamein apne zabt-e-girya ne

ye kaam aur bigaDta gaya banane se

talash ki gai jis dam chaman mein bijli ki

to dastiyab hui mere aashiyane se

duaen dete hain wabastgan-e-dard-e-firaq

gharib bach gae sarkar ke bachane se

sala-e-ishq hai yak-dar-ba-gir-o-muhkam-gir

mujhe to kaam hai sirf un ke aastane se

'qadir' sham-o-sahar ki use bhala kya fikr

wazifa pata ho jo ghaib ke KHazane se