بہلا رہا ہوں دل کو کہ غم معتبر نہیں

بہلا رہا ہوں دل کو کہ غم معتبر نہیں

مانا شب حیات مری مختصر نہیں

وہ کیا گئے کہ ساری مسرت لئے گئے

تسکین دل نہیں ہے قرار جگر نہیں

مے کش وہی ہیں بزم میں جام و سبو وہی

لیکن وہ دل نواز کسی کی نظر نہیں

ایک مشت خاک کے بھی برابر نہیں ہے وہ

دل آشنائے درد محبت اگر نہیں

دیر و حرم میں شیخ و برہمن ہیں فتنہ ساز

محفوظ ان کے شر سے خدا کا بھی گھر نہیں

ہر پھول سینہ چاک ہے ہر شاخ سرنگوں

صحن چمن میں کون ہے جو نوحہ گر نہیں

ہم انتظار صبح بہاراں کئے رہے

گلشن میں اپنے آئی نسیم سحر نہیں

میں ہی ہوں ایک جانب منزل رواں دواں

راہ وفا میں کوئی مرا ہم سفر نہیں

غم ہائے روزگار نقیب خوشی بھی ہیں

وہ کون سی ہے شب جو امین سحر نہیں

اعجاز ہے یہ ان کی محبت کا اے ذکیؔ

مخفی مری نظر سے کوئی رہ گزر نہیں