bahr-e-alam mein dil Dub gaya aaj ki shab

bahr-e-ālām meñ dil Duub gayā aaj kī shab

ek mahshar sā hai siine meñ bapā aaj kī shab

hai musallat mire ehsās kī nannhī lau par

tang hotī huī zulmat kī ridā aaj kī shab

yaas vo chhā.ī ki yuuñ hotā hai mahsūs mujhe

saḳht nā-ḳhush hai ḳhudā.ī se ḳhudā aaj kī shab

haa.e māyūs nigāhoñ kī ye taḳhlīq ki hai

jis taraf dekhiye ik dām-e-balā aaj kī shab

nāz-parvarda-e-āġhosh-e-bahārāñ jo the

unhī armānoñ pe kyā vaqt paḌā aaj kī shab

dil ki bastā huā ik shahr thā armānoñ kā

be-tarah yūrish-e-hijrāñ se luTā aaj kī shab

ai ġham-e-hijr-e-dil-ārām ke maare 'qāzī'

vahshat-āmoz hai kyoñ ghar kī fazā aaj kī shab

bahr-e-alam mein dil Dub gaya aaj ki shab

ek mahshar sa hai sine mein bapa aaj ki shab

hai musallat mere ehsas ki nannhi lau par

tang hoti hui zulmat ki rida aaj ki shab

yas wo chhai ki yun hota hai mahsus mujhe

saKHt na-KHush hai KHudai se KHuda aaj ki shab

hae mayus nigahon ki ye taKHliq ki hai

jis taraf dekhiye ek dam-e-bala aaj ki shab

naz-parwarda-e-aghosh-e-bahaaran jo the

unhi armanon pe kya waqt paDa aaj ki shab

dil ki basta hua ek shahr tha armanon ka

be-tarah yurish-e-hijran se luTa aaj ki shab

ai gham-e-hijr-e-dil-aram ke mare 'qazi'

wahshat-amoz hai kyon ghar ki faza aaj ki shab