بحر خلش میں رہ کے گزاری یہ زندگی

بحر خلش میں رہ کے گزاری یہ زندگی

کب تک رہے گی میری سواری یہ زندگی

بے چارگی پہ خود کی میں رویا تھا زار زار

جب آسماں سے مجھ کو اتاری یہ زندگی

اس کی جبیں پہ کوئی شکن تک نہ آ سکی

جس کی خوشی کے واسطے ہاری یہ زندگی

یہ دل لگی شغف کی قیامت سے کم نہیں

دل تک پہنچ گئی ہے شکاری یہ زندگی

شہر وفا میں پھول سا لہجہ بکھیر کر

اب تک فریب زن کی ہے ماری یہ زندگی

میعاد زندگی کی تو مثل حباب ہے

مدت سمیٹ لیتی ہے ساری یہ زندگی

اس زندگی میں خوئے وفاداریاں نہیں

جیسے کہ موت کی ہو ادھاری یہ زندگی

اخترؔ اسے قضا نے سہاگن بنا دیا

مدت سے جی رہی تھی کنواری یہ زندگی