bahs uski meri waqt-e-mulaqat baDh gai

bahs us kī merī vaqt-e-mulāqāt baḌh ga.ī

bāteñ huiiñ kuchh aisī ki bas baat baḌh ga.ī

bolā na murġh-e-sub.h na aa.ī sadā-e-āh

yā-rab shab-e-firāq kī kyā raat baḌh ga.ī

islāh bhī zarūrī hai ab is kī shaiḳh-jī

dāḌhī tumhārī qibla-e-hājāt baḌh ga.ī

pahuñche thā apnā dast-e-havas jis pe gaah gaah

vo shāḳh-e-meva-dār bhī haihāt baḌh ga.ī

shimla rakhā jo dosh pe lañgūr kī sī dum

kyā is meñ shaiḳh-jī kī karāmāt baḌh ga.ī

jis din se un pe parda-e-poshīdgī paḌā

us din se qadr-e-ālam-e-jinnāt baḌh ga.ī

diiñ gāliyāñ jo tū ne sanam ik ġharīb ko

kyā gāliyāñ diye se tirī zaat baḌh ga.ī

de 'mus.hafī' ko ne.amat-o-daulat tū ai karīm

tā sab kaheñ ki us kī ab auqāt baḌh ga.ī

bahs us ki meri waqt-e-mulaqat baDh gai

baaten huin kuchh aisi ki bas baat baDh gai

bola na murgh-e-subh na aai sada-e-ah

ya-rab shab-e-firaq ki kya raat baDh gai

islah bhi zaruri hai ab is ki shaiKH-ji

daDhi tumhaari qibla-e-hajat baDh gai

pahunche tha apna dast-e-hawas jis pe gah gah

wo shaKH-e-mewa-dar bhi haihat baDh gai

shimla rakha jo dosh pe langur ki si dum

kya is mein shaiKH-ji ki karamat baDh gai

jis din se un pe parda-e-poshidgi paDa

us din se qadr-e-alam-e-jinnat baDh gai

din galiyan jo tu ne sanam ek gharib ko

kya galiyan diye se teri zat baDh gai

de 'mushafi' ko neamat-o-daulat tu ai karim

ta sab kahen ki us ki ab auqat baDh gai