bahta hai koi gham ka samundar mere andar

bahtā hai koī ġham kā samundar mire andar

chalte haiñ tirī yaad ke ḳhanjar mire andar

kohrām machā rahtā hai aksar mire andar

chaltī hai tire naam kī sarsar mire andar

gumnām sī ik jhiil huuñ ḳhāmosh farāmosh

mat pheñk are yaad ke kankar mire andar

jannat se nikālā huā aadam huuñ maiñ aadam

baaqī vahī laġhzish kā hai unsur mire andar

kahte haiñ jise shām-e-firāq ahl-e-muhabbat

Thahrā hai isī shaam kā manzar mire andar

aayā thā koī shahr-e-mohabbat se sitamgar

phir lauT gayā aag jalā kar mire andar

ehsās kā banda huuñ maiñ iḳhlās kā shaidā

hargiz nahīñ hirs-o-havas zar mire andar

kaise bhī hoñ hālāt nimaT letā huuñ hañs kar

sangīn natā.ej kā nahīñ Dar mire andar

maiñ puure dil-o-jān se ho jaatā huuñ us kā

kar letā hai jab shaḳhs koī ghar mire andar

maiñ kyā huuñ mirī hastī hai majmua-e-azdād

tartīb meñ hai kaun sā jauhar mire andar

kuḌhtā hai kabhī dil kabhī ruk jaatī haiñ sāñseñ

har vaqt bapā rahtā hai mahshar mire andar

ham-shakl mirā kaun hai ham-zād-o-hamrāz

rahtā hai koī mujh sā hī paikar mire andar

jab jab koī uftād paḌī khul gayā 'kāshir'

ilhām kā ik aur nayā dar mire andar

bahta hai koi gham ka samundar mere andar

chalte hain teri yaad ke KHanjar mere andar

kohram macha rahta hai aksar mere andar

chalti hai tere nam ki sarsar mere andar

gumnam si ek jhil hun KHamosh faramosh

mat phenk are yaad ke kankar mere andar

jannat se nikala hua aadam hun main aadam

baqi wahi laghzish ka hai unsur mere andar

kahte hain jise sham-e-firaq ahl-e-muhabbat

Thahra hai isi sham ka manzar mere andar

aaya tha koi shahr-e-mohabbat se sitamgar

phir lauT gaya aag jala kar mere andar

ehsas ka banda hun main iKHlas ka shaida

hargiz nahin hirs-o-hawas zar mere andar

kaise bhi hon haalat nimaT leta hun hans kar

sangin nataej ka nahin Dar mere andar

main pure dil-o-jaan se ho jata hun us ka

kar leta hai jab shaKHs koi ghar mere andar

main kya hun meri hasti hai majmua-e-azdad

tartib mein hai kaun sa jauhar mere andar

kuDhta hai kabhi dil kabhi ruk jati hain sansen

har waqt bapa rahta hai mahshar mere andar

ham-shakl mera kaun hai ham-zad-o-hamraaz

rahta hai koi mujh sa hi paikar mere andar

jab jab koi uftad paDi khul gaya 'kashir'

ilham ka ek aur naya dar mere andar