bahte pani ki tarah mauj-e-sada ki surat

bahte paanī kī tarah mauj-e-sadā kī sūrat

sū-e-manzil haiñ ravāñ log havā kī sūrat

jāda-e-zīst pe insān ke aage pīchhe

hādse ghūmte rahte haiñ qazā kī sūrat

dard ko dil ke miTāne ke liye maiñ ab to

roz letā huuñ tirā naam davā kī sūrat

yaad rakh dahr kī dīvār ke ha.Tne par hī

dekh saktī hai koī aañkh ḳhudā kī sūrat

hashr ke roz se pahle bhī to maiñ dāvar-e-hashr

zindagī kaaT ke aayā huuñ sazā kī sūrat

khoj is daur-e-ḳharābī meñ koī ḳhūbī 'soz'

nasl-e-ādam ke liye koī baqā kī sūrat

bahte pani ki tarah mauj-e-sada ki surat

su-e-manzil hain rawan log hawa ki surat

jada-e-zist pe insan ke aage pichhe

hadse ghumte rahte hain qaza ki surat

dard ko dil ke miTane ke liye main ab to

roz leta hun tera nam dawa ki surat

yaad rakh dahr ki diwar ke haTne par hi

dekh sakti hai koi aankh KHuda ki surat

hashr ke roz se pahle bhi to main dawar-e-hashr

zindagi kaT ke aaya hun saza ki surat

khoj is daur-e-KHarabi mein koi KHubi 'soz'

nasl-e-adam ke liye koi baqa ki surat