بہت آساں ہے بام و در بنانا

بہت آساں ہے بام و در بنانا

بہت دشوار لیکن گھر بنانا

اگر دل کو مسرت کی طلب ہو

تو اس کو رنج کا خوگر بنانا

نہ سہہ پاؤ اگر پتھر کی چوٹیں

تو شیشے کا نہ ہرگز گھر بنانا

اب اس انداز سے ہم کیوں نہ سوچیں

کہ ہے اس نسل کو بہتر بنانا

حدیں آفاق کی ملتی ہوں جس سے

دیار فکر میں وہ گھر بنانا

اگر پتھر ہی پوجے جا رہے ہوں

تو پھر لازم ہے دل پتھر بنانا

نشاں ملنا ہو جب منزل کا مشکل

تو اپنے دل کو پھر رہبر بنانا

کوئی باتوں کا حاصل ہی نہ ہو جب

تو کیا باتوں کو درد سر بنانا

سحرؔ جو ترجمان جذب دل ہو

بنانا تو وہی پیکر بنانا