bahut aasan hai baam-o-dar banana

bahut āsāñ hai bām-o-dar banānā

bahut dushvār lekin ghar banānā

agar dil ko masarrat kī talab ho

to is ko ranj kā ḳhūgar banānā

na sah paao agar patthar kī choTeñ

to shīshe kā na hargiz ghar banānā

ab is andāz se ham kyoñ na socheñ

ki hai is nasl ko behtar banānā

hadeñ āfāq kī miltī hoñ jis se

dayār-e-fikr meñ vo ghar banānā

agar patthar hī puuje jā rahe hoñ

to phir lāzim hai dil patthar banānā

nishāñ milnā ho jab manzil kā mushkil

to apne dil ko phir rahbar banānā

koī bātoñ kā hāsil hī na ho jab

to kyā bātoñ ko dard-e-sar banānā

'sahar' jo tarjumān-e-jazb-e-dil ho

banānā to vahī paikar banānā

bahut aasan hai baam-o-dar banana

bahut dushwar lekin ghar banana

agar dil ko masarrat ki talab ho

to is ko ranj ka KHugar banana

na sah pao agar patthar ki choTen

to shishe ka na hargiz ghar banana

ab is andaz se hum kyon na sochen

ki hai is nasl ko behtar banana

haden aafaq ki milti hon jis se

dayar-e-fikr mein wo ghar banana

agar patthar hi puje ja rahe hon

to phir lazim hai dil patthar banana

nishan milna ho jab manzil ka mushkil

to apne dil ko phir rahbar banana

koi baaton ka hasil hi na ho jab

to kya baaton ko dard-e-sar banana

'sahar' jo tarjuman-e-jazb-e-dil ho

banana to wahi paikar banana