bahut chhoTa safar hai zindagi ka

bahut chhoTā safar hai zindagī kā

muqaddar sham' kī hai raushnī kā

sabhī dil toḌ deñge dekh lenā

jhamelā paal rakkhe ho sadī kā

ḳhushī meñ bhī chhupā hotā hai mātam

liyā hai lutf kis ne har ḳhushī kā

nahīñ ghaTtī mohabbat bāñTne se

karoge kyā juTā kar dushmanī kā

rahegā chāñd jab tak āsmāñ meñ

tabhī manzar dikhegā chāñdnī kā

siyāsatdānoñ meñ kursī kī ḳhātir

nasha chaḌhne lagā hai bandagī kā

vafā kī raah meñ bhī aaj 'naurang'

bharosa kar nahīñ sakte kisī kā

bahut chhoTa safar hai zindagi ka

muqaddar sham' ki hai raushni ka

sabhi dil toD denge dekh lena

jhamela pal rakkhe ho sadi ka

KHushi mein bhi chhupa hota hai matam

liya hai lutf kis ne har KHushi ka

nahin ghaTti mohabbat banTne se

karoge kya juTa kar dushmani ka

rahega chand jab tak aasman mein

tabhi manzar dikhega chandni ka

siyasatdanon mein kursi ki KHatir

nasha chaDhne laga hai bandagi ka

wafa ki rah mein bhi aaj 'naurang'

bharosa kar nahin sakte kisi ka