bahut dil kar ke honTon ki shagufta tazgi di hai

bahut dil kar ke hoñToñ kī shagufta tāzgī dī hai

chaman māñgā thā par us ne ba-mushkil ik kalī dī hai

mire ḳhalvat-kade ke raat din yūñhī nahīñ sañvre

kisī ne dhuup baḳhshī hai kisī ne chāndnī dī hai

nazar ko sabz maidānoñ ne kyā kyā vus.ateñ baḳhshīñ

pighalte ābshāroñ ne hameñ dariyā-dilī dī hai

mohabbat nā-ravā taqsīm kī qaa.el nahīñ phir bhī

mirī āñkhoñ ko aañsū tere hoñToñ ko hañsī dī hai

mirī āvārgī bhī ik karishma hai zamāne meñ

har ik darvesh ne mujh ko duā-e-ḳhair hī dī hai

kahāñ mumkin thā koī kaam ham jaise divānoñ se

tumhīñ ne giit likhvā.e tumhīñ ne shā.irī dī hai

bahut dil kar ke honTon ki shagufta tazgi di hai

chaman manga tha par us ne ba-mushkil ek kali di hai

mere KHalwat-kade ke raat din yunhi nahin sanwre

kisi ne dhup baKHshi hai kisi ne chandni di hai

nazar ko sabz maidanon ne kya kya wusaten baKHshin

pighalte aabshaaron ne hamein dariya-dili di hai

mohabbat na-rawa taqsim ki qael nahin phir bhi

meri aankhon ko aansu tere honTon ko hansi di hai

meri aawargi bhi ek karishma hai zamane mein

har ek darwesh ne mujh ko dua-e-KHair hi di hai

kahan mumkin tha koi kaam hum jaise diwanon se

tumhin ne git likhwae tumhin ne shairi di hai