bahut din dars-e-ulfat mein kaTe hain

bahut din dars-e-ulfat meñ kaTe haiñ

mohabbat ke sabaq barsoñ raTe haiñ

junūñ meñ ho gayā hai ab ye darja

ki hai hālat radī kapḌe phaTe haiñ

haram se vāpsī par merī dāvat

huī mai-ḳhāne meñ mai-kash DaTe haiñ

bahut pīr-e-muġhāñ zī-hausla hai

sharāb-e-nāb ke sāġhar luTe haiñ

riyāz o zohd ke jitne the dhabbe

vo saare naqsh-e-bātil ab miTe haiñ

tabarruk the mirī tauba ke TukḌe

bajā.e naql mahfil meñ baTe haiñ

alam ke dard ke hasrat ke ġham ke

maze jitne haiñ saare chaTpaTe haiñ

nahīñ be-vaj.h vaa.iz ronī sūrat

ye hazrat aaj rindoñ meñ piTe haiñ

hue jārūb-kash us dar ke 'parvīñ'

ki saare gard miTTī meñ aTe haiñ

bahut din dars-e-ulfat mein kaTe hain

mohabbat ke sabaq barson raTe hain

junun mein ho gaya hai ab ye darja

ki hai haalat radi kapDe phaTe hain

haram se wapsi par meri dawat

hui mai-KHane mein mai-kash DaTe hain

bahut pir-e-mughan zi-hausla hai

sharab-e-nab ke saghar luTe hain

riyaz o zohd ke jitne the dhabbe

wo sare naqsh-e-baatil ab miTe hain

tabarruk the meri tauba ke TukDe

bajae naql mahfil mein baTe hain

alam ke dard ke hasrat ke gham ke

maze jitne hain sare chaTpaTe hain

nahin be-wajh waiz roni surat

ye hazrat aaj rindon mein piTe hain

hue jarub-kash us dar ke 'parwin'

ki sare gard miTTi mein aTe hain