bahut dinon se khula dar talash karta hun

bahut dinoñ se khulā dar talāsh kartā huuñ

maiñ apne ghar meñ khaḌā ghar talāsh kartā huuñ

palak pe qatra-e-shabnam uThā.e sadiyoñ se

tire karam kā samundar talāsh kartā huuñ

nazar meñ jiit kī tasdīq kā savāl liye

galī galī meñ sikandar talāsh kartā huuñ

badan badan se ḳhulūs-o-vafā kī ḳhushbūeñ

maiñ sūñgh kar nahīñ chhūkar talāsh kartā huuñ

laboñ kī pyaas bujhāne ke vāste saaqī

kisī buzurg kā sāġhar talāsh kartā huuñ

javāharāt ke ik Dher par khaḌā ho kar

na.ī pasand kā patthar talāsh kartā huuñ

tū āñdhiyoñ ke tashaddud kī baat kartā hai

maiñ apne TuuTe hue par talāsh kartā huuñ

bahut dinon se khula dar talash karta hun

main apne ghar mein khaDa ghar talash karta hun

palak pe qatra-e-shabnam uThae sadiyon se

tere karam ka samundar talash karta hun

nazar mein jit ki tasdiq ka sawal liye

gali gali mein sikandar talash karta hun

badan badan se KHulus-o-wafa ki KHushbuen

main sungh kar nahin chhukar talash karta hun

labon ki pyas bujhane ke waste saqi

kisi buzurg ka saghar talash karta hun

jawaharaat ke ek Dher par khaDa ho kar

nai pasand ka patthar talash karta hun

tu aandhiyon ke tashaddud ki baat karta hai

main apne TuTe hue par talash karta hun