bahut dushwar hai taskin-e-zauq-e-rang-o-bu karna

bahut dushvār hai taskīn-e-zauq-e-rañg-o-bū karnā

jo chun sakte ho kāñTe to guloñ kī aarzū karnā

jihād-e-zindagī meñ ho jo ḳhud ko surḳh-rū karnā

jigar ko ḳhaak karnā aur kabhī dil ko lahū karnā

kisī ko dekhne kī ḳhvāb meñ jab aarzū karnā

nazar ko ashk-e-ḳhūn-e-dil se pahle bā-vazū karnā

ḳhirad kā dījiye naam us ko yā dīvāngī kahiye

garebāñ chaak karnā aur dāman ko rafū karnā

baġhair-e-ḳhū-e-taslīm-o-razā jiinā kuchh aisā hai

ki shuġhl-e-bāda-noshī jaise be-jām-o-subū karnā

lage kyuuñ kar jabīñ par apnī dāġh-e-minnat-e-qātil

mujhe aatā hai shamshīr-e-sitam zeb-e-gulū karnā

sar-e-mizhgāñ chhalak kar āñsuoñ ne dast-gīrī kī

kahāñ mumkin thā varna sharh-e-harf-e-ārzū karnā

ye 'ālam hai ki bār-e-ḳhātir-e-sayyād hai 'at.har'

dar-o-dīvār-e-zindāñ se bhī merā guftugū karnā

bahut dushwar hai taskin-e-zauq-e-rang-o-bu karna

jo chun sakte ho kanTe to gulon ki aarzu karna

jihad-e-zindagi mein ho jo KHud ko surKH-ru karna

jigar ko KHak karna aur kabhi dil ko lahu karna

kisi ko dekhne ki KHwab mein jab aarzu karna

nazar ko ashk-e-KHun-e-dil se pahle ba-wazu karna

KHirad ka dijiye nam us ko ya diwangi kahiye

gareban chaak karna aur daman ko rafu karna

baghair-e-KHu-e-taslim-o-raza jina kuchh aisa hai

ki shughl-e-baada-noshi jaise be-jam-o-subu karna

lage kyun kar jabin par apni dagh-e-minnat-e-qatil

mujhe aata hai shamshir-e-sitam zeb-e-gulu karna

sar-e-mizhgan chhalak kar aansuon ne dast-giri ki

kahan mumkin tha warna sharh-e-harf-e-arzu karna

ye 'alam hai ki bar-e-KHatir-e-sayyaad hai 'athar'

dar-o-diwar-e-zindan se bhi mera guftugu karna