بہت ہی پہلے کبھی ہم نے یہاں خیمے لگائے تھے

بہت ہی پہلے کبھی ہم نے یہاں خیمے لگائے تھے

اسی مٹی سے پھر مانوس سے رشتے بنائے تھے

بہت چھوٹی تھی دنیا قرب کے لمحے میسر تھے

محبت نے شناسا سے کئی چہرے اگائے تھے

طنابوں کو نگل کر اٹھ گئے دیوار و در کتنے

دلوں نے کیا بتائیں کس طرح فتنے جگائے تھے

عمارت کی بلندی ساتھ میں گہری تھی بنیادیں

انہیں گہرائیوں نے زخم بھی گہرے لگائے تھے

ہجوم شہر میں کھو کر نہ جانے کس طرح ہم نے

تمہارے واسطے دو چار ہی لمحے چرائے تھے

بہت الجھے ہوئے تھے شاہراہوں اور گلیوں میں

مکاں تک آ کے ہم بھولے وہی کہنے جو آئے تھے

یہ کیسی اجنبیت دی ہمیں مصروف وقتوں نے

کہ بچپن کی شناسائی پہ بھی پہرے بٹھائے تھے

نہ جانے کس طرح ہر چال الٹی ہو گئی ہانیؔ

بڑی ترتیب سے ہم نے بھی یہ مہرے سجائے تھے