bahut hi pahle kabhi humne yahan KHeme lagae the

bahut hī pahle kabhī ham ne yahāñ ḳheme lagā.e the

isī miTTī se phir mānūs se rishte banā.e the

bahut chhoTī thī duniyā qurb ke lamhe mayassar the

mohabbat ne shanāsā se ka.ī chehre ugaa.e the

tanāboñ ko nigal kar uTh ga.e dīvār-o-dar kitne

diloñ ne kyā batā.eñ kis tarah fitne jagā.e the

imārat kī bulandī saath meñ gahrī thī buniyādeñ

unhīñ gahrā.iyoñ ne zaḳhm bhī gahre lagā.e the

hujūm-e-shahr meñ kho kar na jaane kis tarah ham ne

tumhāre vāste do-chār hī lamhe churā.e the

bahut uljhe hue the shāh-rāhoñ aur galiyoñ meñ

makāñ tak aa ke ham bhūle vahī kahne jo aa.e the

ye kaisī ajnabiyyat dī hameñ masrūf vaqtoñ ne

ki bachpan kī shanāsā.ī pe bhī pahre biThā.e the

na jaane kis tarah har chaal ulTī ho ga.ī 'hānī'

baḌī tartīb se ham ne bhī ye mohre sajā.e the

bahut hi pahle kabhi hum ne yahan KHeme lagae the

isi miTTi se phir manus se rishte banae the

bahut chhoTi thi duniya qurb ke lamhe mayassar the

mohabbat ne shanasa se kai chehre ugae the

tanabon ko nigal kar uTh gae diwar-o-dar kitne

dilon ne kya bataen kis tarah fitne jagae the

imarat ki bulandi sath mein gahri thi buniyaaden

unhin gahraiyon ne zaKHm bhi gahre lagae the

hujum-e-shahr mein kho kar na jaane kis tarah hum ne

tumhaare waste do-chaar hi lamhe churae the

bahut uljhe hue the shah-rahon aur galiyon mein

makan tak aa ke hum bhule wahi kahne jo aae the

ye kaisi ajnabiyyat di hamein masruf waqton ne

ki bachpan ki shanasai pe bhi pahre biThae the

na jaane kis tarah har chaal ulTi ho gai 'hani'

baDi tartib se hum ne bhi ye mohre sajae the