bahut jumud tha be-hauslon mein kya karta

bahut jumūd thā be-hausloñ meñ kyā kartā

na lagtī aag to maiñ jañgaloñ meñ kyā kartā

ik imtihān-e-vafā hai ye umr bhar kā azaab

khaḌā na rahtā agar zalzaloñ meñ kyā kartā

ho chob giilī to āḳhir jalā.e kaun us ko

maiñ tujh ko yaad bujhe valvaloñ meñ kyā kartā

mirī tamām harārat zamīñ kā virsa hai

ye āftāb tire bādaloñ meñ kyā kartā

ab is qadar bhī taraf-dār maiñ nahīñ us kā

himāyat us kī ġhalat-faisloñ meñ kyā kartā

ye log vo haiñ jo be-jurm sañgsār hue

harīf rah ke tire manchaloñ meñ kyā kartā

maiñ us ke chehre kī rañgat nahīñ jo uḌ na sakūñ

sameT kar vo mujhe āñchaloñ meñ kyā kartā

adab se rābta dānish kā jāntā hī nahīñ

ulajh ke vo bhī mire mas.aloñ meñ kyā kartā

na raas aa.ī kabhī mujh ko bazm-e-kam-nazarāñ

'fazā' bhī baiTh ke in pāgaloñ meñ kyā kartā

bahut jumud tha be-hauslon mein kya karta

na lagti aag to main jangalon mein kya karta

ek imtihan-e-wafa hai ye umr bhar ka azab

khaDa na rahta agar zalzalon mein kya karta

ho chob gili to aaKHir jalae kaun us ko

main tujh ko yaad bujhe walwalon mein kya karta

meri tamam hararat zamin ka wirsa hai

ye aaftab tere baadalon mein kya karta

ab is qadar bhi taraf-dar main nahin us ka

himayat us ki ghalat-faislon mein kya karta

ye log wo hain jo be-jurm sangsar hue

harif rah ke tere manchalon mein kya karta

main us ke chehre ki rangat nahin jo uD na sakun

sameT kar wo mujhe aanchalon mein kya karta

adab se rabta danish ka jaanta hi nahin

ulajh ke wo bhi mere masalon mein kya karta

na ras aai kabhi mujh ko bazm-e-kam-nazaran

'faza' bhi baiTh ke in pagalon mein kya karta