bahut kuchh be-irada kar chuka hun

bahut kuchh be-irāda kar chukā huuñ

anā se istifāda kar chukā huuñ

abhī bhī zindagī nā-mehrbāñ hai

bahut lahje ko saada kar chukā huuñ

mujhe to sabr kī aadat nahīñ thī

magar had se ziyāda kar chukā huuñ

na jaa.eñ ġham ke mausam un kī marzī

tabassum ko labāda kar chukā huuñ

zamāne-bhar kī yaaro talḳhiyoñ ko

maiñ ḳhud kā ḳhānvāda kar chukā huuñ

masarrat duur hai ab bhī ki maiñ to

bahut dāman kushāda kar chukā huuñ

hamesha in ko maiñ taaza rakhūñgā

maiñ zaḳhmoñ se ye va.ada kar chukā huuñ

vo bāteñ kar rahe haiñ jis safar kī

maiñ kab kā pā-piyāda kar chukā huuñ

bahut kuchh be-irada kar chuka hun

ana se istifada kar chuka hun

abhi bhi zindagi na-mehrban hai

bahut lahje ko sada kar chuka hun

mujhe to sabr ki aadat nahin thi

magar had se ziyaada kar chuka hun

na jaen gham ke mausam un ki marzi

tabassum ko labaada kar chuka hun

zamane-bhar ki yaro talKHiyon ko

main KHud ka KHanwada kar chuka hun

masarrat dur hai ab bhi ki main to

bahut daman kushada kar chuka hun

hamesha in ko main taza rakhunga

main zaKHmon se ye wada kar chuka hun

wo baaten kar rahe hain jis safar ki

main kab ka pa-piyaada kar chuka hun