بہت مخمور ہوتا جا رہا ہوں

بہت مخمور ہوتا جا رہا ہوں

میں اب بھرپور ہوتا جا رہا ہوں

میں چکنا چور ہو پایا نہ اب تک

میں چکنا چور ہوتا جا رہا ہوں

کہا اک زخم نے یہ مسکرا کر

میں اب ناسور ہوتا جا رہا ہوں

اٹھا دو آج پھر محفل سے اپنی

بہت مغرور ہوتا جا رہا ہوں

قریب آیا ہوں اتنا عرض کرنے

میں تم سے دور ہوتا جا رہا ہوں

مری مٹی کو شکوہ ہے یہ مجھ سے

سراپا نور ہوتا جا رہا ہوں

مرے خوابوں پہ گھوڑے دوڑتے ہیں

شب عاشور ہوتا جا رہا ہوں