bahut malul baDe shadman gae hue hain

bahut malūl baḌe shādmāñ ga.e hue haiñ

ham aaj ham-rah-e-gum-gashtagāñ ga.e hue haiñ

agarche aa.e huoñ hī ke saath haiñ ham bhī

magar ga.e huoñ ke darmiyāñ ga.e hue haiñ

nazar to aate haiñ kamroñ meñ chalte-phirte magar

ye ghar ke log na jaane kahāñ ga.e hue haiñ

sahar ko ham se milo go ki shab meñ bhī haiñ yahīñ

ye koī Thiik nahīñ kab kahāñ ga.e hue haiñ

kahīñ se lauT ke qisse sunā.eñge tum ko

kahīñ sunāne ko ham dāstāñ ga.e hue haiñ

talāshiye phir inhīñ meñ tarāshiye phir inheñ

yahī vasīle ki jo rā.egāñ ga.e hote haiñ

abhī ta.ayyun-e-sat.h-e-kalām kyā pūchho

abhī to ham tah-e-ijz-e-bayāñ ga.e hue haiñ

bajā ki raaz kī bāteñ batā.eñge tumheñ 'sāz'

magar sambhal hī ke sunñā miyāñ ga.e hue haiñ

bahut malul baDe shadman gae hue hain

hum aaj ham-rah-e-gum-gashtagan gae hue hain

agarche aae huon hi ke sath hain hum bhi

magar gae huon ke darmiyan gae hue hain

nazar to aate hain kamron mein chalte-phirte magar

ye ghar ke log na jaane kahan gae hue hain

sahar ko hum se milo go ki shab mein bhi hain yahin

ye koi Thik nahin kab kahan gae hue hain

kahin se lauT ke qisse sunaenge tum ko

kahin sunane ko hum dastan gae hue hain

talashiye phir inhin mein tarashiye phir inhen

yahi wasile ki jo raegan gae hote hain

abhi tayyun-e-sath-e-kalam kya puchho

abhi to hum tah-e-ijz-e-bayan gae hue hain

baja ki raaz ki baaten bataenge tumhein 'saz'

magar sambhal hi ke sunna miyan gae hue hain