bahut mushkil tha jina hosh aa jata to kya hota

bahut mushkil thā jiinā hosh aa jaatā to kyā hotā

mai-o-sāġhar se maiñ dil ko na bahlātā to kyā hotā

mire chāk-e-garebāñ hī pe hangāme hue kyā kyā

ḳhudā jaane jo chāk-e-dil nazar aatā to kyā hotā

bahut nākām huuñ phir bhī ye duniyā hai ḳhafā mujh se

mire hāthoñ meñ us kā haath aa jaatā to kyā hotā

ḳharāb-e-tishnagī huuñ phir bhī saaqī mujh se barham hai

kahīñ maiñ mai-kade meñ jaam chhalkātā to kyā hotā

mirī shā.istagī-e-ishq bhī hai jurm kyā kahiye

hujūm-e-shauq meñ dīvāna ho jaatā to kyā hotā

kahāñ tak naaz uThātā chārasāzoñ ġhamgusāroñ ke

'payām' is ishq meñ dil ko na sabr aatā to kyā hotā

bahut mushkil tha jina hosh aa jata to kya hota

mai-o-saghar se main dil ko na bahlata to kya hota

mere chaak-e-gareban hi pe hangame hue kya kya

KHuda jaane jo chaak-e-dil nazar aata to kya hota

bahut nakaam hun phir bhi ye duniya hai KHafa mujh se

mere hathon mein us ka hath aa jata to kya hota

KHarab-e-tishnagi hun phir bhi saqi mujh se barham hai

kahin main mai-kade mein jam chhalkata to kya hota

meri shaistagi-e-ishq bhi hai jurm kya kahiye

hujum-e-shauq mein diwana ho jata to kya hota

kahan tak naz uThata chaarasazon ghamgusaron ke

'payam' is ishq mein dil ko na sabr aata to kya hota