bahut pachhtaoge tum dard-mandon se KHafa ho kar

bahut pachhtāoge tum dard-mandoñ se ḳhafā ho kar

ki gul murjhā ke rah jaatā hai ḳhāroñ se judā ho kar

kahāñ jaanā thā mujh ko aur kahāñ lā kar kiyā rusvā

nigāh-e-shauq ne dhokā diyā hai rahnumā ho kar

sitam kiije jafā kiije magar insāf se kahiye

ye nārāzī bhalā zebā hai bande se ḳhudā ho kar

bahāreñ jā rahī thiiñ jab ḳhizāñ ke saath gulshan se

guloñ kī aañkh meñ bhar aa.e aañsū iltijā ho kar

zamāna gar qayāmat bhī uThātā hai uThāne do

magar uTh kar na jaao mere pahlū se ḳhafā ho kar

ḳhayāl-e-dost ḳhizr-e-rāh hai dasht-e-mohabbat meñ

junūñ hamrāh le jaatā rahā hai rahnumā ho kar

ḳhudārā rahm kar paimān-e-ulfat bāñdhne vaale

kahāñ jā.ūñgā maiñ āḳhir tire ġham se rihā ho kar

na ban jaa.e tumhārī zindagī kā aasrā koī

na itrāo kisī kī zindagī kā aasrā ho kar

mujhe tūfān le jaatā jahāñ merā muqaddar thā

Duboyā hai mirī kashtī ko tum ne nāḳhudā ho kar

hamārī dekhā-dekhī tum vafāoñ par na aa jaanā

zamāne se hameñ kyā mil rahā hai bā-vafā ho kar

bayāñ kyā hāl-e-dil ho jab mohabbat kā ye aalam hai

shikāyat bhī mire hoñToñ pe aatī hai duā ho kar

ajab dastūr hai ai 'raaj duniyā-e-mohabbat kā

jafā.eñ sāmne aa.iiñ vafāoñ kī sazā ho kar

bahut pachhtaoge tum dard-mandon se KHafa ho kar

ki gul murjha ke rah jata hai KHaron se juda ho kar

kahan jaana tha mujh ko aur kahan la kar kiya ruswa

nigah-e-shauq ne dhoka diya hai rahnuma ho kar

sitam kije jafa kije magar insaf se kahiye

ye naraazi bhala zeba hai bande se KHuda ho kar

bahaaren ja rahi thin jab KHizan ke sath gulshan se

gulon ki aankh mein bhar aae aansu iltija ho kar

zamana gar qayamat bhi uThata hai uThane do

magar uTh kar na jao mere pahlu se KHafa ho kar

KHayal-e-dost KHizr-e-rah hai dasht-e-mohabbat mein

junun hamrah le jata raha hai rahnuma ho kar

KHudara rahm kar paiman-e-ulfat bandhne wale

kahan jaunga main aaKHir tere gham se riha ho kar

na ban jae tumhaari zindagi ka aasra koi

na itrao kisi ki zindagi ka aasra ho kar

mujhe tufan le jata jahan mera muqaddar tha

Duboya hai meri kashti ko tum ne naKHuda ho kar

hamari dekha-dekhi tum wafaon par na aa jaana

zamane se hamein kya mil raha hai ba-wafa ho kar

bayan kya haal-e-dil ho jab mohabbat ka ye aalam hai

shikayat bhi mere honTon pe aati hai dua ho kar

ajab dastur hai ai 'raj duniya-e-mohabbat ka

jafaen samne aain wafaon ki saza ho kar