bahut qarib hai pat-jhaD ki rut palak na uTha

bahut qarīb hai pat-jhaḌ kī rut palak na uThā

zamīñ se aks uThā dhuup kī chamak na uThā

ġhilāf-e-sañg meñ lipTā huā hai shahr kā shahr

chalī havā to zamīñ se ġhubār tak na uThā

qadam qadam pe ye Dar thā ki ghaat meñ hai koī

yahāñ to pā-e-tafakkur meñ thī jhijak na uThā

phir apnā apnā kafan le ke chal diye sab log

kisī se bār-e-ġham-e-marg-e-mushtarak na uThā

maiñ chob-e-ġham thā ki pahroñ sulag sulag ke jalā

kabhī jo sho.ala uThā bhī to yak-ba-yak na uThā

shigāf-e-sar ko vajūd-e-havā-e-shor bahut

ye shahr-e-sañg hai yaañ tohmat-e-namak na uThā

bahut zamīñ se uThāyā uThī na parchhā.īñ

girā thā aks kuchh aisā ki aaj tak na uThā

bahut qarib hai pat-jhaD ki rut palak na uTha

zamin se aks uTha dhup ki chamak na uTha

ghilaf-e-sang mein lipTa hua hai shahr ka shahr

chali hawa to zamin se ghubar tak na uTha

qadam qadam pe ye Dar tha ki ghat mein hai koi

yahan to pa-e-tafakkur mein thi jhijak na uTha

phir apna apna kafan le ke chal diye sab log

kisi se bar-e-gham-e-marg-e-mushtarak na uTha

main chob-e-gham tha ki pahron sulag sulag ke jala

kabhi jo shoala uTha bhi to yak-ba-yak na uTha

shigaf-e-sar ko wajud-e-hawa-e-shor bahut

ye shahr-e-sang hai yan tohmat-e-namak na uTha

bahut zamin se uThaya uThi na parchhain

gira tha aks kuchh aisa ki aaj tak na uTha