bahut qarib hai wo husn-e-aftab-numa

bahut qarīb hai vo husn-e-āftāb-numā

visāl-e-yār bhī hone lagā azāb-numā

tamām phūloñ kī ḳhushbū kā imtizāj hai vo

dayār-e-husn meñ ik shaḳhs hai gulāb-numā

har ek lafz kī qismat usī meñ likkhī hai

vo ik hasīn sā chehra jo hai kitāb-numā

ḳhumār-e-bāda se hai muḳhtalif mizāj us kā

chhiTak rahā hai ye āñkhoñ se kyā sharāb-numā

ham us ke chehre se us ko samajh nahīñ sakte

ta.assur-e-ruḳh-e-rangīñ bhī hai naqāb-numā

junūñ-navāz hai zikr-e-ḳhirad hī āḳhir kyoñ

tumhāre lahje meñ kyā chiiz hai sarāb-numā

bahut qarib hai wo husn-e-aftab-numa

visal-e-yar bhi hone laga azab-numa

tamam phulon ki KHushbu ka imtizaj hai wo

dayar-e-husn mein ek shaKHs hai gulab-numa

har ek lafz ki qismat usi mein likkhi hai

wo ek hasin sa chehra jo hai kitab-numa

KHumar-e-baada se hai muKHtalif mizaj us ka

chhiTak raha hai ye aankhon se kya sharab-numa

hum us ke chehre se us ko samajh nahin sakte

tassur-e-ruKH-e-rangin bhi hai naqab-numa

junun-nawaz hai zikr-e-KHirad hi aaKHir kyon

tumhaare lahje mein kya chiz hai sarab-numa