bahut raha hai kabhi lutf-e-yar hum par bhi

bahut rahā hai kabhī lutf-e-yār ham par bhī

guzar chukī hai ye fasl-e-bahār ham par bhī

urūs-e-dahr ko aayā thā pyaar ham par bhī

ye besvā thī kisī shab nisār ham par bhī

biThā chukā hai zamāna hameñ bhī masnad par

huā kiye haiñ javāhir nisār ham par bhī

adū ko bhī jo banāyā hai tum ne mahram-e-rāz

to faḳhr kyā jo huā e'tibār ham par bhī

ḳhatā kisī kī ho lekin khulī jo un kī zabāñ

to ho hī jaate haiñ do ek vaar ham par bhī

ham aise rind magar ye zamāna hai vo ġhazab

ki Daal hī diyā duniyā kā baar ham par bhī

hameñ bhī ātish-e-ulfat jalā chukī 'akbar'

harām ho ga.ī dozaḳh kī naar ham par bhī

bahut raha hai kabhi lutf-e-yar hum par bhi

guzar chuki hai ye fasl-e-bahaar hum par bhi

urus-e-dahr ko aaya tha pyar hum par bhi

ye beswa thi kisi shab nisar hum par bhi

biTha chuka hai zamana hamein bhi masnad par

hua kiye hain jawahir nisar hum par bhi

adu ko bhi jo banaya hai tum ne mahram-e-raaz

to faKHr kya jo hua e'tibar hum par bhi

KHata kisi ki ho lekin khuli jo un ki zaban

to ho hi jate hain do ek war hum par bhi

hum aise rind magar ye zamana hai wo ghazab

ki Dal hi diya duniya ka bar hum par bhi

hamein bhi aatish-e-ulfat jala chuki 'akbar'

haram ho gai dozaKH ki nar hum par bhi