bahut se zamin mein dabae gae hain

bahut se zamīñ meñ dabā.e ga.e haiñ

bahut un ke āshiq jalā.e ga.e haiñ

hamesha se āshiq satā.e ga.e haiñ

hameñ kyā na.e yaañ jalā.e ga.e haiñ

añdherā na hone diyā vasl kī shab

vo sham.oñ pe sham.eñ jalā.e ga.e haiñ

nahīñ be-sabab un ko mujh se rukāvaT

bahut hī sikhā.e paḌhā.e ga.e haiñ

nahīñ vasl kī in se farmā.ish āsāñ

bahut muñh bigāḌe banā.e ga.e haiñ

adāoñ ke nāmoñ ke ġhamzoñ ke mujh par

bahut chor pahre biThā.e ga.e haiñ

nigāhoñ kī chhuriyāñ adāoñ ke ḳhanjar

bahut mere dil par lagā.e ga.e haiñ

laḌāyā hai shah de ke logoñ ne ham ko

bahut roz naqshe jamā.e ga.e haiñ

maiñ nālāñ na thā tere jaur-o-jafā se

zamāne ke dil kyuuñ dukhā.e ga.e haiñ

dil-o-dīda do ghar haiñ tashrīf laa.eñ

sañvāre ga.e haiñ sajā.e ga.e haiñ

ye duniyā hai is meñ hamesha se insāñ

bigāḌe ga.e haiñ banā.e ga.e haiñ

banī-ādam a.azā-e-yak-dīgar-añd

ki miTTī se ham tum banā.e ga.e haiñ

zamīñ se hī aa.e zamīñ hī meñ jaanā

isī se bigāḌe banā.e ga.e haiñ

hamīñ par nahīñ zulm duniyā meñ 'parvīñ'

bahut log yaañ āzmā.e ga.e haiñ

bahut se zamin mein dabae gae hain

bahut un ke aashiq jalae gae hain

hamesha se aashiq satae gae hain

hamein kya nae yan jalae gae hain

andhera na hone diya wasl ki shab

wo shamon pe shamen jalae gae hain

nahin be-sabab un ko mujh se rukawaT

bahut hi sikhae paDhae gae hain

nahin wasl ki in se farmaish aasan

bahut munh bigaDe banae gae hain

adaon ke namon ke ghamzon ke mujh par

bahut chor pahre biThae gae hain

nigahon ki chhuriyan adaon ke KHanjar

bahut mere dil par lagae gae hain

laDaya hai shah de ke logon ne hum ko

bahut roz naqshe jamae gae hain

main nalan na tha tere jaur-o-jafa se

zamane ke dil kyun dukhae gae hain

dil-o-dida do ghar hain tashrif laen

sanware gae hain sajae gae hain

ye duniya hai is mein hamesha se insan

bigaDe gae hain banae gae hain

bani-adam aaza-e-yak-digar-and

ki miTTi se hum tum banae gae hain

zamin se hi aae zamin hi mein jaana

isi se bigaDe banae gae hain

hamin par nahin zulm duniya mein 'parwin'

bahut log yan aazmae gae hain