bahut suljhi hui baaton ko bhi uljhae rakhte hain

bahut suljhī huī bātoñ ko bhī uljhā.e rakhte haiñ

jo hai kaam aaj kā kal tak use laTkā.e rakhte haiñ

taġhāful sā ravā rakhte haiñ us ke sāmne kyā kyā

magar andar hī andar tab.a ko lalchā.e rakhte haiñ

hamārī justujū se dūr-tar hai manzil-e-ma.anī

usī ko kho.e rakhnā hai jise ham paa.e rakhte haiñ

hamārī aarzū apnī samajh meñ bhī nahīñ aatī

pajāma is tarah kā hai jise ulTā.e rakhte haiñ

havā.eñ bhuul kar bhī is taraf kā ruḳh nahīñ kartīñ

so ye shāḳh-e-tamāshā aap hī tharrā.e rakhte haiñ

isī kī raushnī hai aur isī meñ bhasm honā hai

ye shola shaam kā jo raat bhar bhaḌkā.e rakhte haiñ

ham itnī raushnī meñ dekh bhī sakte nahīñ us ko

so apne aap hī is chāñd ko gahnā.e rakhte haiñ

nasheb-e-shā.irī meñ hai hamārī zaat se raunaq

yahī patthar hai jis ko raat din luḌhkā.e rakhte haiñ

ye ghar jis kā hai us ne vāpas aanā hai 'zafar' is meñ

isī ḳhātir dar-o-dīvār ko mahkā.e rakhte haiñ

bahut suljhi hui baaton ko bhi uljhae rakhte hain

jo hai kaam aaj ka kal tak use laTkae rakhte hain

taghaful sa rawa rakhte hain us ke samne kya kya

magar andar hi andar taba ko lalchae rakhte hain

hamari justuju se dur-tar hai manzil-e-mani

usi ko khoe rakhna hai jise hum pae rakhte hain

hamari aarzu apni samajh mein bhi nahin aati

pajama is tarah ka hai jise ulTae rakhte hain

hawaen bhul kar bhi is taraf ka ruKH nahin kartin

so ye shaKH-e-tamasha aap hi tharrae rakhte hain

isi ki raushni hai aur isi mein bhasm hona hai

ye shola sham ka jo raat bhar bhaDkae rakhte hain

hum itni raushni mein dekh bhi sakte nahin us ko

so apne aap hi is chand ko gahnae rakhte hain

nasheb-e-shairi mein hai hamari zat se raunaq

yahi patthar hai jis ko raat din luDhkae rakhte hain

ye ghar jis ka hai us ne wapas aana hai 'zafar' is mein

isi KHatir dar-o-diwar ko mahkae rakhte hain