bahut viraniyan hote hue aabaad ho jaana

bahut vīrāniyāñ hote hue ābād ho jaanā

karishma hai dil-e-nāshād kā yuuñ shaad ho jaanā

koī hālat nahīñ rahtī hai yaksāñ dīda-o-dil meñ

kabhī zanjīr ho jaanā kabhī āzād ho jaanā

baḌī be-ant himmat chāhiye rāh-e-mohabbat meñ

ye zāhir yuuñ koī mushkil nahīñ fariyād ho jaanā

agar be-sūd ho sab āh-o-zārī sāmne us ke

to phir ḳhāmosh rah kar sūrat-e-fariyād ho jaanā

mohabbat ke nagar kā bas yahī dastūr Thahrā hai

ki rāh-e-ishq meñ puurī tarah barbād ho jaanā

hamārī ḳhāksārī kā yahī in.aam kyā kam hai

miTā kar zindagī zinda diloñ kī yaad ho jaanā

baḌī had tak 'zafar' is kashmakash se ham nikal aa.e

anā tasḳhīr karnā sāya-e-ham-zād ho jaanā

vafūr-e-naġhmagī dil-bastagī shā.istagī mazmūn

tasavvur meñ rahā hai mānī-o-bahzād ho jaanā

bahut viraniyan hote hue aabaad ho jaana

karishma hai dil-e-nashad ka yun shad ho jaana

koi haalat nahin rahti hai yaksan dida-o-dil mein

kabhi zanjir ho jaana kabhi aazad ho jaana

baDi be-ant himmat chahiye rah-e-mohabbat mein

ye zahir yun koi mushkil nahin fariyaad ho jaana

agar be-sud ho sab aah-o-zari samne us ke

to phir KHamosh rah kar surat-e-fariyaad ho jaana

mohabbat ke nagar ka bas yahi dastur Thahra hai

ki rah-e-ishq mein puri tarah barbaad ho jaana

hamari KHaksari ka yahi inam kya kam hai

miTa kar zindagi zinda dilon ki yaad ho jaana

baDi had tak 'zafar' is kashmakash se hum nikal aae

ana tasKHir karna saya-e-ham-zad ho jaana

wafur-e-naghmagi dil-bastagi shaistagi mazmun

tasawwur mein raha hai mani-o-bahzad ho jaana