bahuton ne jise arsh pe be-jaan mein dekha

bahutoñ ne jise arsh pe be-jān meñ dekhā

ham ne to use jīte-jī is jaan meñ dekhā

majnūñ thā ham-āġhosh liye lailā ko apnī

yaaro ye tamāshā maiñ bayābān meñ dekhā

jaave bhī phir aave bhī ka.ī shakl se har baar

chakkar meñ kahāñ par ye mazā taan meñ dekhā

faaqa hī rahe roz na kuchh khānā na piinā

ye daur maiñ ne hazrat-e-ramazān meñ dekhā

sab raat laḌeñ ToñTe chhachhūñdar kī laḌā.ī

bhauñchappā maiñ ne chhūTte shābān meñ dekhā

go meve hazāroñ haiñ aur haiñ ne.amateñ lākhoñ

par sab se saris ham ne mazā naan meñ dekhā

har sher taḌāqe kā har ik baat tamāshā

aisā to maiñ ne saudā ke dīvān meñ dekhā

har nafs ko hairān kare sovte jagte

is fan ko maiñ ne hazrat-e-shaitān meñ dekhā

kuchh baat kahe hañs ke to jhaḌte haiñ nire phuul

lahza ye tire is lab-e-ḳhandān meñ dekhā

hañste hī kare der na laḌte hī kare der

ye taur tirā tiflak-e-nādān meñ dekhā

go sarv tire qad kā sā mauzūñ to nahīñ hai

par kahne ko lāchār maiñ bustān meñ dekhā

jo chāh-e-zanaḳh biich girā phiir na niklā

aisā to ka.ī baar maiñ har aan meñ dekhā

kūche kā gayā tere koī phirtā nahīñ hai

maiñ ḳhuub hī kar ġhaur garebān meñ dekhā

tujh chashm kī tashbīh ko nargis kā zikar kyā

sau baar use maiñ ne gulistān meñ dekhā

bahuton ne jise arsh pe be-jaan mein dekha

hum ne to use jite-ji is jaan mein dekha

majnun tha ham-aghosh liye laila ko apni

yaro ye tamasha main bayaban mein dekha

jawe bhi phir aawe bhi kai shakl se har bar

chakkar mein kahan par ye maza tan mein dekha

faqa hi rahe roz na kuchh khana na pina

ye daur main ne hazrat-e-ramazan mein dekha

sab raat laDen TonTe chhachhundar ki laDai

bhaunchappa main ne chhuTte shaban mein dekha

go mewe hazaron hain aur hain neamaten lakhon

par sab se saris hum ne maza nan mein dekha

har sher taDaqe ka har ek baat tamasha

aisa to main ne sauda ke diwan mein dekha

har nafs ko hairan kare sowte jagte

is fan ko main ne hazrat-e-shaitan mein dekha

kuchh baat kahe hans ke to jhaDte hain nire phul

lahza ye tere is lab-e-KHandan mein dekha

hanste hi kare der na laDte hi kare der

ye taur tera tiflak-e-nadan mein dekha

go sarw tere qad ka sa mauzun to nahin hai

par kahne ko lachaar main bustan mein dekha

jo chah-e-zanaKH bich gira phir na nikla

aisa to kai bar main har aan mein dekha

kuche ka gaya tere koi phirta nahin hai

main KHub hi kar ghaur gareban mein dekha

tujh chashm ki tashbih ko nargis ka zikar kya

sau bar use main ne gulistan mein dekha