baiTh kar pas na arman-bhara dil dekha

baiTh kar paas na armān-bharā dil dekhā

ik nazar duur se hī us ne ba-mushkil dekhā

aa.ina dekh ke ḳhud ho gayā bismil dekhā

ham ne to 'aks ko qātil ke bhī qātil dekhā

hijr meñ jiinā to be-shak hai nihāyat dushvār

ishq meñ aur koī kaam na mushkil dekhā

jaan māñgī thī kahā ham ne ki tum par hai nisār

us pe kahte ho ki bas jā bhī tirā dil dekhā

maiñ samajhtā huuñ use apnī mohabbat kī kashish

tū ne muñh pher ke bhī mujh ko jo qātil dekhā

aap kī yaad se maiñ to kabhī ġhāfil na rahā

aap kahte haiñ tujhe ḳhvāb meñ ġhāfil dekhā

bistar-e-gul pe jise dekhā thā sote kal tak

aaj us nuur ke putle ko tah-e-gul dekhā

shaan allāh kī gulshan meñ nazar aa.ī hameñ

kabhī ġhunche pe nazar Daalī kabhī dil dekhā

'umr-bhar ḳhaak uḌātā rahā sahrā kī magar

'umr-bhar qais ne lailā kā na mahmil dekhā

mil gayā ḳhaak meñ ḳhud un kī hifāzat ke liye

shauq-o-armāñ kā muhāfiz tujhe ai dil dekhā

bhar diyā gauhar-e-nāyāb se ashkoñ ne mire

ḳhālī phailā huā jab dāman-e-sāhil dekhā

ham sunāne lage qissa use apnā 'shankar'

ġhair ke zikr se jis dam use ġhāfil dekhā

baiTh kar pas na arman-bhara dil dekha

ek nazar dur se hi us ne ba-mushkil dekha

aaina dekh ke KHud ho gaya bismil dekha

hum ne to 'aks ko qatil ke bhi qatil dekha

hijr mein jina to be-shak hai nihayat dushwar

ishq mein aur koi kaam na mushkil dekha

jaan mangi thi kaha hum ne ki tum par hai nisar

us pe kahte ho ki bas ja bhi tera dil dekha

main samajhta hun use apni mohabbat ki kashish

tu ne munh pher ke bhi mujh ko jo qatil dekha

aap ki yaad se main to kabhi ghafil na raha

aap kahte hain tujhe KHwab mein ghafil dekha

bistar-e-gul pe jise dekha tha sote kal tak

aaj us nur ke putle ko tah-e-gul dekha

shan allah ki gulshan mein nazar aai hamein

kabhi ghunche pe nazar Dali kabhi dil dekha

'umr-bhar KHak uData raha sahra ki magar

'umr-bhar qais ne laila ka na mahmil dekha

mil gaya KHak mein KHud un ki hifazat ke liye

shauq-o-arman ka muhafiz tujhe ai dil dekha

bhar diya gauhar-e-nayab se ashkon ne mere

KHali phaila hua jab daman-e-sahil dekha

hum sunane lage qissa use apna 'shankar'

ghair ke zikr se jis dam use ghafil dekha