baiTha hun apni zat ka naqsha nikal ke

baiThā huuñ apnī zaat kā naqsha nikāl ke

ik be-zamīn haarī huuñ sahrā nikāl ke

DhūñDā bahut magar koī rasta nahīñ milā

is zindagī se terā havāla nikāl ke

almārī se mile mujhe pahle pahal ke ḳhat

baiThā huā huuñ aap kā vā'da nikāl ke

vīrāniyoñ pe aañkh chhamā-chham baras paḌī

laayā huuñ maiñ to dasht se dariyā nikāl ke

āsāniyāñ hī sochte rahte haiñ yaar log

uqbā nikāl kar kabhī duniyā nikāl ke

ham raftagāñ se haT ke bhī dekheñ to she'r meñ

mauzūa kam hī bachte haiñ nauha nikāl ke

milnā kahāñ thā sahl dar-e-āgahī mujhe

aayā huuñ maiñ pahāḌ se rasta nikāl ke

vā'iz nihāl aaj ḳhushī se hai kis qadar

ik taaza iḳhtilāf kā nukta nikāl ke

mun.im ko us nivāle kī lazzat kā kyā patā

mazdūr jo kamā.e pasīna nikāl ke

hālāt kyā ġharīb ke badle ki har koī

le aayā hai qarīb kā rishta nikāl ke

'jāzib' kahāñ ḳhabar thī ki hai baaz taak meñ

ham shaad the qafas se parinda nikāl ke

baiTha hun apni zat ka naqsha nikal ke

ek be-zamin haari hun sahra nikal ke

DhunDa bahut magar koi rasta nahin mila

is zindagi se tera hawala nikal ke

almari se mile mujhe pahle pahal ke KHat

baiTha hua hun aap ka wa'da nikal ke

viraniyon pe aankh chhama-chham baras paDi

laya hun main to dasht se dariya nikal ke

aasaniyan hi sochte rahte hain yar log

uqba nikal kar kabhi duniya nikal ke

hum raftagan se haT ke bhi dekhen to she'r mein

mauzua kam hi bachte hain nauha nikal ke

milna kahan tha sahl dar-e-agahi mujhe

aaya hun main pahaD se rasta nikal ke

wa'iz nihaal aaj KHushi se hai kis qadar

ek taza iKHtilaf ka nukta nikal ke

munim ko us niwale ki lazzat ka kya pata

mazdur jo kamae pasina nikal ke

haalat kya gharib ke badle ki har koi

le aaya hai qarib ka rishta nikal ke

'jazib' kahan KHabar thi ki hai baz tak mein

hum shad the qafas se parinda nikal ke