baiTha hun chup lagae mohabbat ki rah mein

baiThā huuñ chup lagā.e mohabbat kī raah meñ

tasvīr un kī phirtī hai merī nigāh meñ

apne parā.e ho ga.e ulfat kī raah meñ

duniyā badal badal ga.ī apnī nigāh meñ

rakhtā huuñ Dar ke paañv mohabbat kī raah meñ

ek ek pech-o-ḳham haiñ hamārī nigāh meñ

gardan pe teġh phir ga.ī dil par chhurī chalī

dohrā asar thā ik tirī tirchhī nigāh meñ

rahtā hai dil ke sāmne 'ālam ḳhayāl kā

duniyā-e-husn phirtī hai merī nigāh meñ

ā.īna dekhte ho jo tan-tan ke bār-bār

dekho samā na jaao ḳhud apnī nigāh meñ

vo shaad kyā ho vādī-e-aiman ko dekh kar

har zarra barq-e-tūr hai jis kī nigāh meñ

ab tak bahut ġhurūr hai ab tak bahut hai naaz

do din rahā thā koī tumhārī nigāh meñ

tum kyā samā ga.e ho ki ham ne samajh liyā

duniyā samā ga.ī hai hamārī nigāh meñ

'bismil' ho kyā umīd-e-karam ḳhud-pasand se

achchhā nahīñ koī bhī kisī kī nigāh meñ

baiTha hun chup lagae mohabbat ki rah mein

taswir un ki phirti hai meri nigah mein

apne parae ho gae ulfat ki rah mein

duniya badal badal gai apni nigah mein

rakhta hun Dar ke panw mohabbat ki rah mein

ek ek pech-o-KHam hain hamari nigah mein

gardan pe tegh phir gai dil par chhuri chali

dohra asar tha ek teri tirchhi nigah mein

rahta hai dil ke samne 'alam KHayal ka

duniya-e-husn phirti hai meri nigah mein

aaina dekhte ho jo tan-tan ke bar-bar

dekho sama na jao KHud apni nigah mein

wo shad kya ho wadi-e-aiman ko dekh kar

har zarra barq-e-tur hai jis ki nigah mein

ab tak bahut ghurur hai ab tak bahut hai naz

do din raha tha koi tumhaari nigah mein

tum kya sama gae ho ki hum ne samajh liya

duniya sama gai hai hamari nigah mein

'bismil' ho kya umid-e-karam KHud-pasand se

achchha nahin koi bhi kisi ki nigah mein