baiTha hun dil mein yar ko mehman kiye hue

baiThā huuñ dil meñ yaar ko mehmāñ kiye hue

zarre ko rashk-e-mahr-e-daraḳhshāñ kiye hue

terī nigāh-e-lutf ke shāyāñ kiye hue

laayā huuñ dil ko rashk-e-gulistāñ kiye hue

ik maiñ ki jam.a apne hī dil ko na kar sakā

ik tum ki jitne dil bhī pareshāñ kiye hue

yuuñ kah rahā huuñ girya-e-furqat kā mājrā

har ashk hai tahayya-e-tūfāñ kiye hue

kahtī hai ab vo aañkh mirā qissa-e-vafā

ehsās-e-infi.āl ko unvāñ kiye hue

baiThe haiñ ahl-e-shauq tirī jalva-gāh meñ

tār-e-nazar ko tār-e-rag-e-jāñ kiye hue

ehsās kī hudūd meñ kyoñ kar Thahar sake

jo dil ho sair-e-ālam-e-vijdāñ kiye hue

ik jannat-e-nigāh hai āñkhoñ ke sāmne

dil hai tasavvur-e-ruḳh-e-jānāñ kiye hue

tauba kā ehtirām bajā lekin ai 'rashīd'

pās-e-silā-e-rahmat-e-yazdāñ kiye hue

baiTha hun dil mein yar ko mehman kiye hue

zarre ko rashk-e-mahr-e-daraKHshan kiye hue

teri nigah-e-lutf ke shayan kiye hue

laya hun dil ko rashk-e-gulistan kiye hue

ek main ki jama apne hi dil ko na kar saka

ek tum ki jitne dil bhi pareshan kiye hue

yun kah raha hun girya-e-furqat ka majra

har ashk hai tahayya-e-tufan kiye hue

kahti hai ab wo aankh mera qissa-e-wafa

ehsas-e-infial ko unwan kiye hue

baiThe hain ahl-e-shauq teri jalwa-gah mein

tar-e-nazar ko tar-e-rag-e-jaan kiye hue

ehsas ki hudud mein kyon kar Thahar sake

jo dil ho sair-e-alam-e-wijdan kiye hue

ek jannat-e-nigah hai aankhon ke samne

dil hai tasawwur-e-ruKH-e-jaanan kiye hue

tauba ka ehtiram baja lekin ai 'rashid'

pas-e-sila-e-rahmat-e-yazdan kiye hue