baiTha hun siyah-baKHt o mukaddar isi ghar mein

baiThā huuñ siyah-baḳht o mukaddar isī ghar meñ

utrā thā mirā māh-e-munavvar isī ghar meñ

ai saañs kī ḳhushbū lab-o-āriz ke pasīne

kholā thā mire dost ne bistar isī ghar meñ

chaTkī thiiñ isī kunj meñ us hoñT kī kaliyāñ

mahke the vo auqāt-e-mayassar isī ghar meñ

afsāna-dar-afsāna thī muḌtī huī sīḌhī

ash.ār-dar-ash.ār thā har dar isī ghar meñ

hotī thī harīfāna bhī har baat pe ik baat

rahtī thī raqībāna bhī aksar isī ghar meñ

sharminda huā thā yahīñ pindār-e-imārat

chamkā thā faqīroñ kā muqaddar isī ghar meñ

vo jin ke dar-e-nāz pe jhuktā thā zamāna

aate the baḌī duur se chal kar isī ghar meñ

baiTha hun siyah-baKHt o mukaddar isi ghar mein

utra tha mera mah-e-munawwar isi ghar mein

ai sans ki KHushbu lab-o-ariz ke pasine

khola tha mere dost ne bistar isi ghar mein

chaTki thin isi kunj mein us honT ki kaliyan

mahke the wo auqat-e-mayassar isi ghar mein

afsana-dar-afsana thi muDti hui siDhi

ashaar-dar-ashaar tha har dar isi ghar mein

hoti thi harifana bhi har baat pe ek baat

rahti thi raqibana bhi aksar isi ghar mein

sharminda hua tha yahin pindar-e-imarat

chamka tha faqiron ka muqaddar isi ghar mein

wo jin ke dar-e-naz pe jhukta tha zamana

aate the baDi dur se chal kar isi ghar mein