baiThe baiThe muskura di KHud hi ghabrai kabhi

baiThe baiThe muskurā dī ḳhud hī ghabrā.ī kabhī

pyaar ke mausam meñ aisī bhī ghaḌī aa.ī kabhī

aap kā dāman to sāhil ret kā sābit huā

mauj-e-ashk-e-ḳhūñ bhī jis ko tar na kar paa.ī kabhī

apne sar le kar zamāne bhar kī saarī tohmateñ

dafn kar dī apnī ḳhāmoshī meñ goyā.ī kabhī

saath guzre chand lamhoñ kī sunahrī yaad se

chalne lagtī hai mire sāñsoñ meñ purvā.ī kabhī

zindagī bhar aap apne aa.ine meñ gum rahe

shaḳhsiyat yā shakl merī bhī nazar aa.ī kabhī

chhoḌiye ye to hamāre pyaar kā hai mo.ajiza

duur ab se aap bhī hote the harjā.ī kabhī

ik kiran hī chāñd kī ban kar maiñ ho jaatī nisār

aarzū lekin 'ayāñ' apnī na bar aa.ī kabhī

baiThe baiThe muskura di KHud hi ghabrai kabhi

pyar ke mausam mein aisi bhi ghaDi aai kabhi

aap ka daman to sahil ret ka sabit hua

mauj-e-ashk-e-KHun bhi jis ko tar na kar pai kabhi

apne sar le kar zamane bhar ki sari tohmaten

dafn kar di apni KHamoshi mein goyai kabhi

sath guzre chand lamhon ki sunahri yaad se

chalne lagti hai mere sanson mein purwai kabhi

zindagi bhar aap apne aaine mein gum rahe

shaKHsiyat ya shakl meri bhi nazar aai kabhi

chhoDiye ye to hamare pyar ka hai moajiza

dur ab se aap bhi hote the harjai kabhi

ek kiran hi chand ki ban kar main ho jati nisar

aarzu lekin 'ayan' apni na bar aai kabhi