baiThe hain wo khinche hue mujh KHasta-tan ke pas

baiThe haiñ vo khiñche hue mujh ḳhasta-tan ke paas

rahte bhī haiñ to rahte haiñ shamshīr ban ke paas

us but ke saath yuuñ mirī tasvīr khīñch do

siine ke paas siina dahan ho dahan ke paas

ham ko duā do bāñdh diyā hai girah meñ dil

rakkhā hī kyā thā zulf-e-shikan-dar-shikan ke paas

lipTī rahī gale se tirī teġh hijr meñ

qismat se umr kaT ga.ī bāñkī dulhan ke paas

dil meñ hazār tiir jigar meñ hazār zaḳhm

kāñTe khaḌe hue haiñ hamāre chaman ke paas

bose vo ḳhaak degā ki dene ke naam se

muTThī meñ qaul tak nahīñ paimāñ-shikan ke paas

shīrīñ kī yaad hijr meñ hai uzr-e-ḳhud-kushī

mīThī chhurī thī tesha na thā kohkan ke paas

hasrat se kah rahā hai lab-e-gor-e-kushtagāñ

mar mar ke pahuñche haiñ ye musāfir vatan ke paas

kyā din the vo ki hote the har roz ratjage

soyā huuñ muddatoñ but-e-nāzuk-badan ke paas

dil ke phapole phūTe to ubhre jigar ke zaḳhm

jannat lagī rahī mire bait-ul-huzan ke paas

phirtī raheñgī dillī kī galiyāñ nigāh meñ

'rāsiḳh' bahisht meñ bhī rahūñgā vatan ke paas

baiThe hain wo khinche hue mujh KHasta-tan ke pas

rahte bhi hain to rahte hain shamshir ban ke pas

us but ke sath yun meri taswir khinch do

sine ke pas sina dahan ho dahan ke pas

hum ko dua do bandh diya hai girah mein dil

rakkha hi kya tha zulf-e-shikan-dar-shikan ke pas

lipTi rahi gale se teri tegh hijr mein

qismat se umr kaT gai banki dulhan ke pas

dil mein hazar tir jigar mein hazar zaKHm

kanTe khaDe hue hain hamare chaman ke pas

bose wo KHak dega ki dene ke nam se

muTThi mein qaul tak nahin paiman-shikan ke pas

shirin ki yaad hijr mein hai uzr-e-KHud-kushi

miThi chhuri thi tesha na tha kohkan ke pas

hasrat se kah raha hai lab-e-gor-e-kushtagan

mar mar ke pahunche hain ye musafir watan ke pas

kya din the wo ki hote the har roz ratjage

soya hun muddaton but-e-nazuk-badan ke pas

dil ke phapole phuTe to ubhre jigar ke zaKHm

jannat lagi rahi mere bait-ul-huzan ke pas

phirti rahengi dilli ki galiyan nigah mein

'rasiKH' bahisht mein bhi rahunga watan ke pas