baiThe ho sar-e-rahguzar kyon nahin jate

baiThe ho sar-e-rāhguzar kyoñ nahīñ jaate

tum log to ghar vaale ho ghar kyoñ nahīñ jaate

ye vaqt ke hākim haiñ sunā vaqt ke hākim

ye kahte haiñ mar jaao to mar kyoñ nahīñ jaate

is baat se zāhir hai tumhīñ ek ḳhudā ho

ham varna kisī aur ke dar kyoñ nahīñ jaate

pal hī meñ guzar jaatī hai sukh-chain kī rāteñ

dukh-dard ke din pal meñ guzar kyoñ nahīñ jaate

muddat se kurede bhī nahīñ yaad kisī kī

phir zaḳhm mire siine ke bhar kyoñ nahīñ jaate

is daur meñ jiinā hai to makkār kā jiinā

ye baat haqīqat hai to mar kyoñ nahīñ jaate

itne hī agar tañg ho is shahar se 'āsī'

chupke se kisī duur nagar kyoñ nahīñ jaate

baiThe ho sar-e-rahguzar kyon nahin jate

tum log to ghar wale ho ghar kyon nahin jate

ye waqt ke hakim hain suna waqt ke hakim

ye kahte hain mar jao to mar kyon nahin jate

is baat se zahir hai tumhin ek KHuda ho

hum warna kisi aur ke dar kyon nahin jate

pal hi mein guzar jati hai sukh-chain ki raaten

dukh-dard ke din pal mein guzar kyon nahin jate

muddat se kurede bhi nahin yaad kisi ki

phir zaKHm mere sine ke bhar kyon nahin jate

is daur mein jina hai to makkar ka jina

ye baat haqiqat hai to mar kyon nahin jate

itne hi agar tang ho is shahar se 'asi'

chupke se kisi dur nagar kyon nahin jate