baiThe rahenge tham ke kab tak yun Khaali paimane log

baiThe raheñge thaam ke kab tak yuuñ ḳhālī paimāne log

had se baḌhe jab tishna-labī to phūñk na deñ maiḳhāne log

ham duniyā ko de kar ḳhushiyāñ ġham badle meñ lete haiñ

DhūñDe se bhī ab na mileñge ham jaise dīvāne log

kyā jāneñ yuuñ dil ke kitne zaḳhm hare ho jaate haiñ

chheḌ ke baat ik harjā.ī kī aate haiñ samjhāne log

ik shā.ir dīvāna sā kyuuñ nagrī nagrī phirtā hai

aa.e yā na samajh meñ aa.e gaḌhte haiñ afsāne log

dil par kitne zaḳhm lage haiñ tab jā kar ye jaanā hai

apnoñ se to achchhe haiñ har sūrat ye begāne log

baiThe rahenge tham ke kab tak yun KHali paimane log

had se baDhe jab tishna-labi to phunk na den maiKHane log

hum duniya ko de kar KHushiyan gham badle mein lete hain

DhunDe se bhi ab na milenge hum jaise diwane log

kya jaanen yun dil ke kitne zaKHm hare ho jate hain

chheD ke baat ek harjai ki aate hain samjhane log

ek shair diwana sa kyun nagri nagri phirta hai

aae ya na samajh mein aae gaDhte hain afsane log

dil par kitne zaKHm lage hain tab ja kar ye jaana hai

apnon se to achchhe hain har surat ye begane log