baj rahi thin dur kuchh shahnaiyan kal raat ko

baj rahī thiiñ duur kuchh shahnā.iyāñ kal raat ko

karvaTeñ letī rahīñ añgḌā.iyāñ kal raat ko

aarzū kā ik samundar chīḳhtā hī rah gayā

dil ke sāhil pe thiiñ bas ḳhāmoshiyāñ kal raat ko

tīrgī kā dard sannāToñ kī aahaT karb-e-hijr

saath apne laa.ī thiiñ ḳhāmoshiyāñ kal raat ko

shor-o-ġhul meñ ḳhud ko dafnā kar rakhā thā din tamām

barf sā pighlā ga.iiñ tanhā.iyāñ kal raat ko

us se milnā tang kūche meñ baḌā mahñgā paḌā

umr bhar kī de gayā rusvā.iyāñ kal raat ko

us kī ye ta.abīr hai dāman meñ hai sāhil kī ret

niiñd meñ thiiñ ḳhvāb kī gahrā.iyāñ kal raat ko

har taraf thī ik udāsī chāñd thā na chāñdnī

ḳhvāb oḌhe so rahī thiiñ badliyāñ kal raat ko

thak ke mere saath āḳhir so ga.iiñ pichhle pahar

bhīnī bhīnī yaad kī parchhā.iyāñ kal raat ko

ḳhāmushī rakhtī rahī chun chun ke palkoñ par mire

yaad kī bikhrī huī kuchh kirchiyāñ kal raat ko

niiñd kyā aatī ki bistar ban chukā thā ḳhār-zār

thapkiyāñ detī rahī thiiñ talḳhiyāñ kal raat ko

mogre kī narm nāzuk pattiyāñ tere baġhair

silvaToñ par ḳhaar kī thiiñ Tahniyāñ kal raat ko

baj rahi thin dur kuchh shahnaiyan kal raat ko

karwaTen leti rahin angDaiyan kal raat ko

aarzu ka ek samundar chiKHta hi rah gaya

dil ke sahil pe thin bas KHamoshiyan kal raat ko

tirgi ka dard sannaTon ki aahaT karb-e-hijr

sath apne lai thin KHamoshiyan kal raat ko

shor-o-ghul mein KHud ko dafna kar rakha tha din tamam

barf sa pighla gain tanhaiyan kal raat ko

us se milna tang kuche mein baDa mahnga paDa

umr bhar ki de gaya ruswaiyan kal raat ko

us ki ye tabir hai daman mein hai sahil ki ret

nind mein thin KHwab ki gahraiyan kal raat ko

har taraf thi ek udasi chand tha na chandni

KHwab oDhe so rahi thin badliyan kal raat ko

thak ke mere sath aaKHir so gain pichhle pahar

bhini bhini yaad ki parchhaiyan kal raat ko

KHamushi rakhti rahi chun chun ke palkon par mere

yaad ki bikhri hui kuchh kirchiyan kal raat ko

nind kya aati ki bistar ban chuka tha KHar-zar

thapkiyan deti rahi thin talKHiyan kal raat ko

mogre ki narm nazuk pattiyan tere baghair

silwaTon par KHar ki thin Tahniyan kal raat ko