baja ki darpai-e-azar chashm-e-tar hai bahut

bajā ki darpai-e-āzār chashm-e-tar hai bahut

palaT ke ā.ūñgā maiñ garche ye safar hai bahut

Thahar sako to Thahar jaao mere pahlū meñ

vo dhuup hai ki yahī sāya-e-shajar hai bahut

darīda bāheñ ḳhizāñ meñ pukārtī haiñ chalo

havā-e-tund meñ har shāḳh be-sipar hai bahut

kahūñ to vo mirī rūdād-e-dard bhī na sune

ki jaise us ko mire haal kī ḳhabar hai bahut

kalī ḳhumār ke aalam meñ kasmasātī hai

khulī hai aañkh magar niiñd kā asar hai bahut

mirā qadam hī nahīñ hijr meñ bagūla-sifat

bichhaḌ ke mujh se tirā ġham bhī dar-ba-dar hai bahut

haiñ muntazir ki ye dariyā-e-dard kab utre

haiñ ḳhush ki dil kā safīna to mauj par hai bahut

na ḳhalvat-e-ġham-e-duniyā na bazm-e-jāñ 'tausīf'

tumhāre vāste ik bekasī kā ghar hai bahut

baja ki darpai-e-azar chashm-e-tar hai bahut

palaT ke aaunga main garche ye safar hai bahut

Thahar sako to Thahar jao mere pahlu mein

wo dhup hai ki yahi saya-e-shajar hai bahut

darida bahen KHizan mein pukarti hain chalo

hawa-e-tund mein har shaKH be-sipar hai bahut

kahun to wo meri rudad-e-dard bhi na sune

ki jaise us ko mere haal ki KHabar hai bahut

kali KHumar ke aalam mein kasmasati hai

khuli hai aankh magar nind ka asar hai bahut

mera qadam hi nahin hijr mein bagula-sifat

bichhaD ke mujh se tera gham bhi dar-ba-dar hai bahut

hain muntazir ki ye dariya-e-dard kab utre

hain KHush ki dil ka safina to mauj par hai bahut

na KHalwat-e-gham-e-duniya na bazm-e-jaan 'tausif'

tumhaare waste ek bekasi ka ghar hai bahut