baja ki hai pas-e-hashr hum ko karenge pas-e-shabab pahle

bajā ki hai pās-e-hashr ham ko kareñge pās-e-shabāb pahle

hisāb hotā rahegā yārab hameñ mañgā de sharāb pahle

fazā-e-shab hañs ke jagmagā.ī vo nāznīñ sub.h ban ke aa.ī

huā hai raushan mire shabistāñ meñ chāñd se āftāb pahle

zabāñ pe aayā na harf-e-matlab ki kah ga.iiñ kuchh sharīr nazreñ

savāl karne na paa.e haiñ ham ki mil gayā hai javāb pahle

jināñ meñ pahle-pahal piyegā to laḌkhaḌātā phiregā zāhid

surūr-e-kausar kī hai agar dhan jahāñ meñ pī le sharāb pahle

hai ḳhusrav-e-ishq kā ye farmāñ ki dil lagānā nahīñ hai āsāñ

jise ho kū-e-butāñ kā armāñ vo kū-ba-kū ho ḳharāb pahle

ġham-o-alam ranj-o-yās-o-hasrat uThā.ūñgā sab ke ruḳh se parde

tumheñ qasam hai dil-e-hazīñ kī uThāo to tum naqāb pahle

ilāhī vo bū-e-pairahan se bhī pahle ho ham-kanār aa kar

chaman meñ hotā hai jalva-afroz phuul se māhtāb pahle

ye kis ke rañg-e-ruḳh-e-bahārīñ ne baḳhsh dī hai tarāvat-e-nau

shagufta hotā na thā gulistāñ meñ us adā se gulāb pahle

nigāh-e-sāqī kī muskurā.ī kahā jab 'aḳhtar' ne apnī dhan meñ

piyeñge piite raheñge mai-kash magar ye ḳhāna-ḳharāb pahle

baja ki hai pas-e-hashr hum ko karenge pas-e-shabab pahle

hisab hota rahega yarab hamein manga de sharab pahle

faza-e-shab hans ke jagmagai wo naznin subh ban ke aai

hua hai raushan mere shabistan mein chand se aaftab pahle

zaban pe aaya na harf-e-matlab ki kah gain kuchh sharir nazren

sawal karne na pae hain hum ki mil gaya hai jawab pahle

jinan mein pahle-pahal piyega to laDkhaData phirega zahid

surur-e-kausar ki hai agar dhan jahan mein pi le sharab pahle

hai KHusraw-e-ishq ka ye farman ki dil lagana nahin hai aasan

jise ho ku-e-butan ka arman wo ku-ba-ku ho KHarab pahle

gham-o-alam ranj-o-yas-o-hasrat uThaunga sab ke ruKH se parde

tumhein qasam hai dil-e-hazin ki uThao to tum naqab pahle

ilahi wo bu-e-pairahan se bhi pahle ho ham-kanar aa kar

chaman mein hota hai jalwa-afroz phul se mahtab pahle

ye kis ke rang-e-ruKH-e-bahaarin ne baKHsh di hai tarawat-e-nau

shagufta hota na tha gulistan mein us ada se gulab pahle

nigah-e-saqi ki muskurai kaha jab 'aKHtar' ne apni dhan mein

piyenge pite rahenge mai-kash magar ye KHana-KHarab pahle