baja ki naqsh-e-kaf-e-pa pe sar bhi rakhna hai

bajā ki naqsh-e-kaf-e-pā pe sar bhī rakhnā hai

magar buland maqām-e-nazar bhī rakhnā hai

saḳhāvat aisī dikhā.ī ki ghar luTā baiThe

na sochā ye bhī ki kuchh apne ghar bhī rakhnā hai

hoñ zaḳhm zaḳhm kahāñ tak maiñ chāragar se kahūñ

idhar bhī rakhnā hai marham udhar bhī rakhnā hai

ye jabr dekho ki rahnā bhī hai sar-e-maqtal

har ek vaar bhī sahnā hai sar bhī rakhnā hai

rah-e-hayāt meñ thaknā bhī hai yaqīnī sā

phir apne aap ko vaqf-e-safar bhī rakhnā hai

ilāhī ḳhair ki tūfān-e-bād-o-bārāñ meñ

hameñ bachānā hai ḳhud ko bhī ghar meñ rakhnā hai

ye kyā sitam hai ki sayyād ham asīroñ ko

rihā bhī karnā hai be-bāl-o-par bhī rakhnā hai

kise batā.eñ ki ġham us kī be-niyāzī kā

vo ġham hai jis se use be-ḳhabar bhī rakhnā hai

musāfiro abhī manzil ke haiñ paḌāv bahut

isī hisāb se zād-e-safar bhī rakhnā hai

ye uzr hai ki unheñ niiñd aane lagtī hai

bayān-e-qissa-e-ġham muḳhtasar bhī rakhnā hai

'vaqār' tum suḳhn-o-āgahī se guzre ho

tumhī ko pās-e-'vaqār'-e-hunar bhī rakhnā hai

baja ki naqsh-e-kaf-e-pa pe sar bhi rakhna hai

magar buland maqam-e-nazar bhi rakhna hai

saKHawat aisi dikhai ki ghar luTa baiThe

na socha ye bhi ki kuchh apne ghar bhi rakhna hai

hon zaKHm zaKHm kahan tak main chaaragar se kahun

idhar bhi rakhna hai marham udhar bhi rakhna hai

ye jabr dekho ki rahna bhi hai sar-e-maqtal

har ek war bhi sahna hai sar bhi rakhna hai

rah-e-hayat mein thakna bhi hai yaqini sa

phir apne aap ko waqf-e-safar bhi rakhna hai

ilahi KHair ki tufan-e-baad-o-baran mein

hamein bachana hai KHud ko bhi ghar mein rakhna hai

ye kya sitam hai ki sayyaad hum asiron ko

riha bhi karna hai be-baal-o-par bhi rakhna hai

kise bataen ki gham us ki be-niyazi ka

wo gham hai jis se use be-KHabar bhi rakhna hai

musafiro abhi manzil ke hain paDaw bahut

isi hisab se zad-e-safar bhi rakhna hai

ye uzr hai ki unhen nind aane lagti hai

bayan-e-qissa-e-gham muKHtasar bhi rakhna hai

'waqar' tum suKHn-o-agahi se guzre ho

tumhi ko pas-e-'waqar'-e-hunar bhi rakhna hai