بخشا گیا ہے دل کو وہ سامان آگہی

بخشا گیا ہے دل کو وہ سامان آگہی

حیرت کدہ ہے دہر بہ عنوان آگہی

آئی بہار جیب و گریباں پہ ہاتھ ہے

ہو جائے تار تار نہ دامان آگہی

اک وہم ہے کہ پاؤں میں ڈالے ہے بیڑیاں

اک عزم ہے کہ کچھ نہیں زندان آگہی

نے موسم بہار ہے نے باد کوئے یار

مہکا گیا ہے کون شبستان آگہی

دل منحرف خیال غلط پر ہوس نگاہ

دشمن بنے ہوئے ہیں بہی خوان آگہی

ایمان مضمحل ہے عقیدت لہو لہو

ہو جائے پاش پاش نہ ایقان آگہی

طوفان تند و تیز سہی دیکھتے رہو

بجھنے نہ پائے شمع فروزان آگہی