بخت برگشتہ ہیں ایسے جو ہوس کر دیکھیں

بخت برگشتہ ہیں ایسے جو ہوس کر دیکھیں

خاک ہاتھ آئے اگر خواب میں بھی زر دیکھیں

بد نصیبی یہی کہتی ہے جہاں زر دیکھیں

ادھر آئیے آپ اور کوئی گھر دیکھیں

ہر نفس کوچ ہے آنکھوں میں ہے دم مثل حباب

حشر پر وعدۂ دیدار ہے کیوں کر دیکھیں

ہم وہ مے خوار ہیں جز بادہ کشی راہ نہ دے

استخارہ بھی اگر توبۂ مے پر دیکھیں

پتلیاں بے اجل آنکھوں کی مری پھر جائیں

مردم چشم کو دے کر جو وہ چکر دیکھیں

دیکھنا ہے جو انہیں میری سیہ کاری دل

کسی شیشے میں سیاہی کو کہو بھر دیکھیں

بے قراروں میں وہ بیکس ہیں کہ روئے نہ کوئی

ہم تڑپ کر بھی جو پارے کی طرح مر دیکھیں

سادہ رویوں سے یہ قول دل بے عشق ہے شادؔ

آپ اے آئنہ رو اور کوئی گھر دیکھیں